Kaozeadenn vrezhoneg gant Mael Jezequel

Ganet eo Mael Jezequel e 1995 e Brest. Er gêr e veze kaozeet galleg ha brezhoneg setu lakaet eo bet en ur skol bublik divyezhek e Lanniliz. Meur a vicher en deus graet goude-se ha war ar memes-tro en deus graet studioù war ar brezhoneg e Skol-Veur Brest (UBO). Goude-se eo bet degemeret evit sevel un dezenn diwar-benn un atlas yezhoniezh (leñgwistik), ennañ 5 000 lec'h enklask etre Bro-Skos ha kreisteiz Bro-Spagn hed-ha-hed an aod. Bez e oa Mael e karg e Brest deus ar c'hentelioù tañva d'an enklask hag istor ar yezhoù keltiek, en aotreegezh hag e master. Kenlabouret en deus gant arkeologourien ha genetourien evit kas da benn e enklaskoù. Abaoe 2024 e labour e Ti ar Vro Bro-Leon.

Dont a raio Mael Jezequel da gaozeal eus anvioù an tachennoù douar a vez kavet e-barzh ar c’hadastr kozh abaoe mare Napoleon, impalaer Bro-C’Hall e penn kentañ an XIXvet kandved. Er c’hadastr-se e kaver kartennoù, ment an tachennoù douar, anvioù ar berc'henned hag evit ar pezh a sell ouzh Breizh-Izel, anvioù ar parkeier e brezhoneg.  Diaes eo gouzout gant piv int bet skrivet ha disingal eo al labour transkrivañ. Daoust da-se, studiañ anvioù ar parkeier a c'hell harpañ al labour enklask graet gant an arkeologourien, an dud a labour war istor an natur hag an dud dedennet gant an doareoù da gaozeal war hir amzer.

Krog eo Mael ha Ti ar Vro Bro-Leon gant ur raktres nevez : kinnig un datathon diwar-benn anvioù ar parkeier e Gwiseni. Bodet e vez tud a-youl vat evit bizskrivañ anvioù ul lodenn deus ar gumun ha sevel ur gartenn nevez. Ul labour a seurt-se a c'hell servijout d'an tiez-kêr, p'o dez ezhomm da reiñ anvioù da hentoù pe karterioù nevez.